Judg 3 | NdeIBE | STEP | Nanzi izizwe ezatshiywa nguJehova ukuze abahlole bonke abako-Israyeli ababengazibonanga izimpi eKhenani

Judges 3

1 Nanzi izizwe ezatshiywa nguJehova ukuze abahlole bonke abako-Israyeli ababengazibonanga izimpi eKhenani 2 (wenza lokhu ukuba azifundise izizukulwana zama-Israyeli ukulwiwa kwezimpi lezo ezazingazange zikubone ukulwa ngaphambili): 3 ababusi abahlanu bamaFilisti, amaKhenani wonke, amaSidoni, lamaHivi ahlala ezintabeni zaseLebhanoni kusukela eNtabeni iBhali Hemoni kusiya eLebho Hamathi.

4 Babetshiyelwe ukuhlola abako-Israyeli ukuba kubonakale ukuthi bayayilalela na imilayo kaJehova, ayeyinike okhokho babo ngoMosi.

5 Abako-Israyeli babehlala phakathi kwamaKhenani, lamaHithi, lama-Amori, lamaPherizi, lamaHivi kanye lamaJebusi.

6 Bathatha amadodakazi awo aba ngomkabo njalo bendisela amadodakazi abo emadodaneni awo, bakhonza labonkulunkulu bawo.

U-Othiniyeli

7 Abako-Israyeli benza okubi emehlweni kaJehova; bamkhohlwa uJehova uNkulunkulu wabo bakhonza oBhali labo-Ashera. 8 Ulaka lukaJehova lwavutha ku-Israyeli waze wabanikela ezandleni zikaKhushani-Rishathayimi inkosi yase-Arami Naharayimi, abantu bako-Israyeli ababengaphansi kombuso wayo iminyaka eficamibili. 9 Kodwa ekukhaleni kwabo kuJehova, wabalethela umhlengi, u-Othiniyeli indodana kaKhenazi, umnawakhe kaKhalebi, owabakhululayo. 10 Umoya kaJehova wehlela kuye, wasesiba ngumahluleli wako-Israyeli waya empini. UJehova wanikela uKhushani-Rashathayimi ezandleni zika-Othiniyeli, wamnqoba. 11 Ngakho ilizwe laba lokuthula iminyaka engamatshumi amane, u-Othiniyeli indodana kaKhenazi waze wafa.

U-Ehudi

12 Abako-Israyeli baphinda benza okubi emehlweni kaJehova, kwathi ngenxa yokuthi babenze lobububi uJehova wanika u-Egiloni inkosi yaseMowabi amandla phezu kuka-Israyeli. 13 Esenze ama-Amoni lama-Amaleki amanyana laye, u-Egiloni wayahlasela u-Israyeli, basebethumba idolobho laMalala. 14 Abako-Israyeli baba ngaphansi kombuso ka-Egiloni inkosi yaseMowabi iminyaka elitshumi laficamibili.

15 Abako-Israyeli bakhala futhi kuJehova, wasebapha umhlengi u-Ehudi, indoda eyayilinxele indodana kaGera umBhenjamini. Abako-Israyeli bamthuma lomthelo ku-Egiloni inkosi yaseMowabi. 16 U-Ehudi wayenze inkemba esika inxa zombili eyayingaba yingalo lengxenye ubude bayo, ayibophela emlenzeni wakhe wesokudla ngaphansi kwezigqoko zakhe.

17 Wawethula umthelo ku-Egiloni inkosi yaseMowabi, owayengumuntu oqatha kakhulu.

18 Emva kokuba u-Ehudi esewethule umthelo, walaya abantu ababewuthwele ukuba bazihambele. 19 Ezithombeni eduze leGiligali yena uqobo wabuyela emuva, wathi, “O nkosi, ngilelizwi lakho eliyimfihlo.” Inkosi yathi, “Thula!” Zonke izikhonzi zayo zasuka kuyo.

20 U-Ehudi wayilanda isihlezi yodwa ekamelweni langaphezulu elipholileyo endlini yayo yobukhosi wathi, “Ngilelizwi lakho elivela kuNkulunkulu.” Kwathi inkosi isukuma esihlalweni sayo, 21 u-Ehudi wafinyelela ngesandla sakhe senxele, wahwatsha inkemba emlenzeni wakhe kwesokudla wayithela esiswini senkosi. 22 Lesilanda satshona phakathi lenhlendla eyaze yathutsha emhlane wayo. UEhudi kayingcothulanga inkemba, idanga layimboza. 23 U-Ehudi waya phandle ekhulusini lendlu wavala iminyango yekamelo langaphezulu wayikhiya.

24 Esehambile kweza izinceku zathola iminyango yekamelo langaphezulu ikhiyiwe. Zathi, “Kutsho ukuthi iye ngaphandle ekamelweni elingaphakathi kwendlu.” 25 Zalinda zaze zakhathazeka, kodwa ngoba ingasavulanga iminyango yekamelo lelo, zathatha ikhiye zayivula. Lapho-ke zabona inkosi yazo iwele phansi, isifile.

26 Zisalindile, u-Ehudi wasuka wahamba. Wedlula eduzane lezithombe wabalekela eSeyira. 27 Esefike lapho wakhalisa icilongo elizweni lezintaba lako-Efrayimi, abako-Israyeli basebesehla laye ezintabeni, yena ebakhokhele.

28 Wabalaya wathi, “Ngilandelani, ngoba uJehova usenikele uMowabi, isitha senu, ezandleni zenu.” Ngakho behlela laye phansi bemlandela, kwathi sebethumbe amazibuko eJodani ayewelela eMowabi, kabaze bavumela muntu ukuba achaphele ngaphetsheya.

29 Ngalesosikhathi babulala amaMowabi ayengaba yizinkulungwane ezilitshumi, wonke ayeqinile elamandla; akukho muntu owaphunyukayo. 30 Ngalolosuku iMowabi yanqotshwa yi-Israyeli, ilizwe laselisiba lokuthula iminyaka engamatshumi aficamibili.

UShamigari

31 Emva kuka-Ehudi kwaba loShamigari indodana ka-Anathi owabulala amaFilisti angamakhulu ayisithupha ngesijujo senkabi. Laye wamkhulula u-Israyeli.